Paraulas : Parla me

PARLA ME ♫♪

Parla me , conta me del que soscas grand paire,

Conta me , parla me de ton pais,

E lo grand paire canturleja son conte

L’enfant dins sos brasses s’es tot acoconit.

Per trapar mon pais, cercas pas dins las cartas,

Lo camin per i anar es pas marcat,

E per frontièra, i a pas que la musica,

D’una lenga vielha que se vol pas calhar.

Mon vilatge es aquí, a la cima del (dins) lo causse,

Lo solelh de Julhet calfa sus l’adret,

Per la devesa , i a lo tropèl que paissa ,

A l’ombra d’un fraisse lo pastre es assetat .

Mon ostal es aquí, bastit de grossas peiras,

Un clapàs que ten caud val mai qu’un nis,

Lo fòc de lenha dins lo canton esclaira,

Enfant e grand paire que se son endormits.